“Ο ΚΟΚΟΖΛΑΚΕΥΤΕΡ”, (της Παρθένας Τσοκτουρίδου), (Απόσπασμα από το ερωτικό θεατρικό παραμύθι του Πόντου)

Ο ΚΟΚΟΖΛΑΚΕΥΤΕΡ

(της Παρθένας Τσοκτουρίδου)

 (Απόσπασμα από το ερωτικό θεατρικό παραμύθι του Πόντου)

(Παίξιμο ποντιακής λύρας. Μπαίνει στη σκηνή ο άρχοντας Τζουντζουβανίδης. Δυο υπηρέτες είναι κρυμμένοι πίσω από ένα δέντρο και ξαπλώνουν).

ΘΕΡΑΠΟΣ: Ε, ξικωτέ Τσομάζε! (Ο Τσομάζος τρομάζει).

ΤΣΟΜΑΖΟΣ: Ντο έντονε, Θεραπέ;

ΘΕΡΑΠΟΣ: Αχατοχάς ο αφέντησ’ εμουν ο Τζουντζουβανίδης. Κλωστ’ τέρεν’ ατον. Εξέβεν σον μπαλκόν’ ατ’. Ελέπσ’  ατον, γιόξαμ γιοκ;

ΤΣΟΜΑΖΟΣ: Κορτς είμαι;Ντο έμορφα πα εκαλοκάτσεν σο αναπαυτέρκον το κάθισμαν’ ατ’. Άμον ντ’ εθαρρείς εν’ εβουτιγμένος σ’ ίναν θαμαστόν γαλενέσα. Αμά, το ματοτέρεμαν’ ατ’ πολλά τεβεκελίν εν’. Μίαν αδά τερεί και μίαν εκεί. Η στάση’ ατ’ πα εν’ άμον ντ’ εθαρρείς τη Απόλλωνος το άγλαμαν.

ΘΕΡΑΠΟΣ: Κατ’ άμον εθάμαξεσ’ ατον, ελέπω.

ΤΣΟΜΑΖΟΣ: Ναι, εθάμαξα τον. Σην γούλα σ’ ερούξεν; Γιατί, εσύ κι εσάσεψες; Ελέπω το σάσεμα σ’ σο κατσή σ’.

ΘΕΡΑΠΟΣ: Αληθίτκα εγώ πα πολλά εθάμαξα τον. Κιαμτό; Εν να μη σασεύς; Παρέμον ατός κι φορεί τσεβρέ σο κιφάλν’ ατ άμον εσέν.  Ακομάν κι εμιμιδίασες ασά ιδρωτήρασ’ ησ’; Κι αλλομίαν ατός κι εν οστούδιν και βουδοπέτζιν άμον εσέν. Εσκαμπρίασες και ένουσνε άμον αγροτερίδ’. Κι επεκεί ατός εν πολλά τρανός. Παλαλούσαι ασά μεγαλεία τ’ ασήν αμέτρετην δόξαν’ ατ κι ασό τρανόν χαζνέν ντο εχ’.

ΤΣΟΜΑΖΟΣ: Ατά μαναχά κι είναι.

ΘΕΡΑΠΟΣ: Ζατίμ γιοκ. Εν και πολλά τρανοκάρδς και εχ’ σιδερή μούστα. (Τον δίνει μια μπουνιά και τον ρίχνει κάτω. Εκείνος σηκώνεται ζαλισμένος με την βοήθεια του). Ναθεμά σε, νεκρανάλατε! Ερούξες;

ΤΣΟΜΑΖΟΣ: Τούλωσον, αφορεσμένε Θεραπέ! Μη τσαίεισ’. Τερεί αδακές! Άμον ντ’ εθαρρώ, έσκσε μας! Χάιτε, ας φεύομε να εφτάμε τα δουλείασ’ εμουν γιατί θα τσαίειζ’ μας.

ΘΕΡΑΠΟΣ: Καλά λες, νεροτζούλαρε! Έφυαμε! (Κάνει να φύγει και πέφτει πάνω στον Τσομάζο και του δίνει μια κεφαλιά πάνω στο κεφάλι του). Επεντρόπσες κι εντόκες με, νε βοθρακίτζε! Θα δίγω σε ίναν σαμάραν και θα εφτάγω σε βαρύκωφον. (Του πιάνει το αυτί και του το τραβάει). Ε. πολλά παπαβαρέσιμος εγέντ’σε. Χάιτε, ας χάμες. (Τον σκουντάει κι εκείνος αντιδράει).

ΤΣΟΜΑΖΟΣ: Χαχόλε! Βουτοροβάρελε!

ΘΕΡΑΠΟΣ: Θα παίρω σε μάραντε και πάω σα ταφία, θα ψάλλω τον κανόνα και θα περιαπλώνω σε σα κοβλακίτας και σα κουκουβάκας. Έξες άκωλε σελενιασμένε;

ΤΣΟΜΑΖΟΣ: Έξα, άψετε και αχώνεβε! (Ο Τσομάζος τον βγάζει από την σκηνή τραβώντας τον).

ΤΖΟΥΝΤΖΟΥΒΑΝΙΔΗΣ: (Τραγουδάει):

Θεός σ’ επουράνια, ερρούξεν κι εκυλίεν

Έρθεν, είδεν τα ίτενα κι Ατός εκολατίεν.

…………………
Διαβάστε περισσότερα: http://mormolykeia-tis-p-tsoktoyridoy.webnode.gr